Tagħlim elettroniku
It-tagħlim elettroniku huwa tagħlim b’rata awtonoma li jagħmel użu minn teknoloġiji multimedjali ġodda għat-taħriġ. L-użu tal-Internet itejjeb il-kwalità tat-tagħlim billi jiffaċilita l-aċċess għar-riżorsi u s-servizzi, kif ukoll permezz ta’ skambji u kollaborazzjoni mill-bogħod. Permezz ta’ ħoss, grafika u interattività, it-tagħlim elettroniku jipprovdi lill-istudenti b’esperjenza ta’ tagħlim multisensorjali li tippermetti aktar komprensjoni u żamma ta’ għarfien.
Maż-żmien, it-tagħlim elettroniku evolva, u qed joffri soluzzjonijiet ta’ taħriġ aktar flessibbli bħal tagħlim imħallat. It-tagħlim imħallat huwa taħlita ta’ tagħlim b’rata awtonoma ta’ tagħlim u taħriġ fil-klassi. Il-komponent wiċċ imb’ wiċċ jista’ jkun assoċjat mat-tagħlim elettroniku b’ħafna modi. Il-proporzjon ta’ taħriġ wiċċ imb’ wiċċ jista’ jvarja minn kors għal ieħor.
Kemm it-tagħlim elettroniku kif ukoll it-tagħlim imħallat għandhom vantaġġi ċari mil-lat tal-organizzazzjoni ta’ azzjonijiet ta’ appoġġ professjonali għall-interpreti fid-DĠ Interpretazzjoni. Din tippermetti li jingħelbu wħud mid-diffikultajiet biex jinstabu dati xierqa għall-korsijiet. B’serje ta’ sessjonijiet organizzati bil-metodu mħallat, l-interpreti li jieħdu sehem f’kors partikolari jeħtieġ li jkunu disponibbli biss fl-istess data u ħin għas-sessjonijiet fil-klassi u jistgħu jwettqu l-parti tat-tagħlim online meta jkun l-aħjar għalihom.
Id-DĠ Interpretazzjoni bħalissa qed jiżviluppa l-għażla tiegħu ta’ tagħlim online. Il-materjal rilevanti li jirriżulta online (eż. korsijiet online tad-DĠ Interpretazzjoni, links għal korsijiet open source u preżentazzjonijiet, preżentazzjonijiet irrekordjati) se jkun disponibbli, sa fejn hu possibbli, fiċ-Ċentru tal-Għarfien dwar l-Interpretazzjoni.