Din mhix lista eżawrjenti. Hi tinkludi s-sħab tradizzjonali tagħna fid-dinja tal-interpretar tal-konferenzi. Għal sħab oħra jekk jogħġbok ara l-lingwa tas-sinjali tal-konferenzi, is-servizz pubbliku u l-interpretazzjoni legali.
Assoċjazzjonijiet Professjonali
AIIC - Association Internationale d'Interprètes de Conférence
L-AIIC hija l-unika assoċjazzjoni globali ta’ interpreti tal-konferenzi, u tiġbor flimkien aktar minn 3,000 professjonist minn kull kontinent, li huma elenkati f’direttorju. L-AIIC ilha aktar minn 60 sena tippromwovi standards għoljin ta’ kwalità u etika fil-professjoni u tirrappreżenta l-interessi tal-prattikanti tagħha. L-attivitajiet u l-proġetti tal-AIIC għandhom l-għan li jgħinu lill-prattikanti individwali u lill-komunità dinjija tal-interpreti biex jissodisfaw l-isfidi ta’ dinja li qed tinbidel b’mod rapidu.
FIT - Federazzjoni Internazzjonali tat-Tradutturi
Il-FIT hija raggruppar internazzjonali ta’ assoċjazzjonijiet ta’ tradutturi, interpreti u terminoloġisti. Huma affiljati magħha aktar minn 100 assoċjazzjoni professjonali u istituti tat-taħriġ, li jirrappreżentaw aktar minn 80,000 traduttur f’55 pajjiż. L-għan tal-Federazzjoni huwa li tippromwovi l-professjonaliżmu fid-dixxiplini li tirrappreżenta.
EST - Soċjetà Ewropea għall-Istudji tat-Traduzzjoni
Is-soċjetà ġiet stabbilita fi Vjenna fl-1992 u issa għandha membri f’aktar minn 46 pajjiż. Hi tiffunzjona bħala network għar-riċerka, forum għall-iskambju, u ċentru għal riżorsi ta’ riċerka. L-għanijiet tagħha, kif iddikjarati fil-Kostituzzjoni tagħha, huma li trawwem ir-riċerka fit-traduzzjoni u l-interpretazzjoni, li tippromwovi l-edukazzjoni avvanzata għall-għalliema tat-traduzzjoni u l-interpretazzjoni u li toffri pariri dwar it-taħriġ tat-tradutturi u l-interpreti biex tiffaċilita l-kuntatti bejn il-professjonisti u l-istituzzjonijiet akkademiċi rilevanti tat-traduzzjoni u l-interpretazzjoni. L-EST hija network internazzjonali ta’ akkademiċi fl-oqsma tat-traduzzjoni u l-interpretar.
Networks u assoċjazzjonijiet internazzjonali
IAMLADP - Laqgħa Annwali Internazzjonali dwar l-Arranġamenti Lingwistiċi, id-Dokumentazzjoni u l-Pubblikazzjonijiet
L-IAMLADP ġiet stabbilita madwar 35 sena ilu mill-Kwartieri Ġenerali tan-Nazzjonijiet Uniti. Hija forum internazzjonali u network ta’ maniġers ta’ organizzazzjonijiet internazzjonali li jimpjegaw fornituri tas-servizzi tal-konferenzi u tal-lingwa – l-aktar tradutturi u interpreti. Il-laqgħa annwali tal-IAMLADP hija opportunità biex l-organizzazzjonijiet tal-IAMLADP jiltaqgħu fl-istess post, jevalwaw il-ħidma mwettqa mid-diversi Gruppi ta’ Ħidma (WGs) u Task Forces (TFs), jiskambjaw informazzjoni, ideat u l-aħjar prattiki u networks ma’ xulxin.
Id-DĠ Interpretazzjoni jgawdi reputazzjoni eċċellenti fost il-membri tal-IAMLADP, b’mod aktar partikolari għall-Grupp ta’ Ħidma dwar l-Attivitajiet ta’ Taħriġ li ġie propost mid-DĠ Interpretazzjoni, fejn it-tħassib ewlieni tiegħu huwa li jiżgura provvista suffiċjenti ta’ gradwati professjonali gradwati. Id-DĠ Interpretazzjoni ilu mill-2015 jippresiedi t-Task Force tal-Impriżi Konġunti ta’ Taħriġ.
CIUTI - Conférence Internationale Permanente d'Instituts Universitaires de Traducteurs et Interprètes
Imnedija fl-1960, CIUTI hija l-assoċjazzjoni internazzjonali l-aktar antika u l-aktar prestiġjuża tad-dinja tal-istituti universitarji bi programmi ta’ traduzzjoni u interpretazzjoni. Is-sħubija teħtieġ li jiġu ssodisfati kriterji stretti ta’ kwalità u hija siġill distint ta’ kwalità.
Id-DĠ Interpretazzjoni regolarment jiġi mistieden għal-laqgħat tas-CIUTI.
HINTS - Kapijiet ta’ Servizzi ta’ Interpretazzjoni
HINTS huwa network dinji ta’ Kapijiet tas-Servizzi ta’ Interpretazzjoni, maħluq fl-2006, bil-għan li jkun hemm skambju tal-aħjar prattiki.
Il-membri jagħtu pariri u jgħinu lil xulxin fir-rigward ta’ mistoqsijiet urġenti u jżommu kuntatt b’mod elettroniku.
Il-partijiet ikkonċernati huma: Il-Grupp tal-Bank Afrikan għall-Iżvilupp, ARTE, il-Kunsill tal-Ewropa, l-Istituzzjonijiet Ewropej, Eurocontrol, id-Deutsche Bundestag, l-Organizzazzjoni Ewropea tal-Privattivi, il-FAO, il-Ministeru Federali Ġermaniż tad-Difiża, il-Gvern Federali tat-Traduzzjonijiet tal-Kanada, il-QKI, it-Tribunal Kriminali Internazzjonali għal dik li qabel kienet il-Jugoslavja, l-ILO, il-FMI, in-NATO, il-Kulleġġ tad-Difiża tan-NATO, l-OECD, is-Segretarjat tal-Komunità tal-Paċifiku, it-Tribunal Speċjali għal-Libanu, il-UNESCO, in-Nazzjonijiet Uniti, id-Dipartiment tal-Istat tal-Istati Uniti, il-Grupp tal-Bank Dinji, id-WHO, id-WTO, l-Organizzazzjoni Dinjija tat-Turiżmu u l-Organizzazzjoni Meteoroloġika Dinjija.
Id-DĠ Interpretazzjoni jipparteċipa f’HINTS sabiex jikkoopera mas-servizzi lingwistiċi ta’ organizzazzjonijiet internazzjonali oħra b’mod partikolari fil-qasam tal-interpretazzjoni.